Tað hevur skapt eina ávísa ónøgd, serliga í Sambandsflokkinum, eftir at flokkurin, sum andstøðuflokkur, kom inn og bjargaði samgonguni í málinum um Gongd í haga.
Einum málið, sum landsstýrismaðurin, Høgni Hoydal, formaður í Tjóðveldi átti.
Fyrr í dag frættist so, at ein av tungu dreingunum í flokkinum, fyrrverandi landsstýrismaðurin og løgtingsmaðurin, Bjørn Kalsø, hevði tikið seg úr sum lim í flokkinum, tí hann var so misnøgdur við landbúnaðarpolitikkin hjá Sambandsflokkinum.
Bjørn Kalsø, sum eisini er bóndi á Syðradali, hevur alment givið fleiri ferðir til kennar hvussu ónøgdur hann er um ferðavinnulóggávuna hjá Høgna Hoydal.
Eisini Magnus Rasmussen í Lamba, sum bæði er bóndi og sambandsmaður er misnøgdur við landbúnaðarpolitikkin og málið um Gongd í haga.
Tað sást eisini aftur til atkvøðugreiðsluna til 3. viðgerð, tá ið uppskotið endaliga var samtykt týsdagin í hesi vikuni. Tá atkvøddi hann, sum einasti sambandsmaður, ímóti uppskotinum.
Magnus Rasmussen sigur við Eysturoyarportalin í kvøld, at tað er rætt, at hann ikki tók undir við málinum og atkvøddi eisini ímóti tí. Tað sum honum ikki dámar við lógini er í stuttum tað, at ræðisrætturin verður skerdur. Víðari sigur hann eisini, at hann ikki umhugsi at lima seg úr flokkinum.
Á løgtingsvalinum 1.september 2015 varð hann á fyrsta sinni valdur í Løgtingið, hann fekk 503 atkvøður, ið var fjórð flest hjá Sambandsflokkinum.
Hann hevur eisini sitið sum landsstýrismaður í umhvørvis- og vinnumálum fyri Sambandsflokkin frá 2021 til 2022.
Deil á Facebook
